Miren eta Xabier Amuriza Altzon

Erabiltzailearen aurpegia Altzoko Kultura Batzordea 2016ko api. 27a, 13:47

Datorren ostirala, apirilak 29, egun handia izango da Altzoko bertsozale guztientzat, Xabier Amurizaren jarraitzaile direnentzat bereziki. Xabier Amuriza eta Miren Amuritza izango ditugu herrian bertsotara etorrita. 

Aurretik, Xabier Amurizaren ibilbidea errepasatuko dugu berarekin, Udaletxeko areto nagusian; ondoren izango da afaria eta aita-alaben arteko bertso jarduna Elordi Elkartean.

Saio berezia izango da Elordi Elkarteko afalostekoa, batetik Xabier Amurizak Altzon egingo duen azkenekoa izango delako eta bestetik, saio hau bere alaba Mirenekin egingo duelako, gai librean. Askotan aritu da bertsotan Xabier gure herrian eta, beti, prestutasunez eta gogo onez erantzun dio egindako deiari.

Altzora bertsotara azkenekoz etorriko denez, bere ibilbideaz hitz egiteko ere aprobetxatu nahi dugu. Afal aurretik izango da hizketaldia, 19:30etan. Udaletxeko areto nagusian elkartuko gara Xabier Amurizarekin bere ibilbideaz, bidez eta bidegurutzez, hitz egiteko. Batik bat bertsolaritzaren eremuan egindakoaz eta egiteko utziez, eremu askotan aritu baita Xabier, ariko gara berarekin.

Bertsolaritza modernoaren aitzindari nabarmenena eta, askorentzat, aitapontekoa da bera; luxu handia da guretzat bere bizipenen testigantza zuzena jasotzeko aukera izatea, altzotarrontzat eta inguratu nahi duzuen guzientzat. Manuel Olanok gidatuko du hizketaldia, Manuelek berak, Felix Irazustabarrenak eta Jexux Muruak ondutako gidoiean oinarrituta.

Gonbidatuak zaudete etorri nahi duzuen guztiak. Ekitaldia Elordi Elkarteak antolatu du Udalaren babesarekin.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!