Orotara lau topaketa egingo dira Gipuzkoan eta horietako bat da Tolosakoa. Proiektuen Azoka (K)idea-k topaketa fisiko eta birtualak sustatzeko gunea da, ideiak, baliabideak eta tresnak partekatzea helburu duena. Besteengandik ikasteko, eztabaidatzeko eta ekarpenak egiteko espazioa, bakoitzaren proiektuetatik abiatuz, haratago joateko modua. Sorkuntza kolektiboaren alorrean, parte hartzaileek aurkeztutako ideiak eta proiektuak aberasten saiatuko dira. Prestakuntzari dagokionean berriz, pertsonak gaituko dituzte, proiektuak prestatu, diseinatu eta garatzeko.
Horrenbestez, biharko ekitaldia trukatze eta garapen kolektiborako plaza izango da. Elkarbanatzeko, ikasteko, eta gizarte eraldaketarako proiektuak eta ideiak taldean gauzatzeko espazio fisikoa. Bederatzi orduz jolasak, mokaduak, talde lanak, ikaskuntza eta erremintak nahastuko dituen espazio dibertigarri bilakatuko da Tolosako kultur etxea. Helburua: guztion artean, gure ideiak eta proiektuak sendotzeko bidean beste pauso bat ematea.
Bestalde, aipatu, Gipuzkoan zehar egingo diren aurrez aurreko lau jardunaldien osagarri moduan, martxan dela www.proiektuenazoka.org plataforma digitala ere. Izan ere, bertan, garatutako baliabideak, izaera irekian, eskuragarri izango dira edonorentzat.
EGITARAUA
09:15-10:00 Aurkezpena, ongietorria eta gosari emankorra
10:00-10:30 Proiektuen Azoka (K)idea.
10:3013:15 Praktika eta proiektuen aurkezpena
13:15-14:30 Catering eta tokian tokiko ekoizleak
14:30-17:15 Ikasketak eta komunikazioa; kudeaketa, iraunkortasuna eta baloreak.
17:15-18:00 Balorazioa
18:00-18:15 Hurrengora arte
