Gas eta argi konpainia batzuk jendea engainatu nahian dabiltzala ohartarazi du Tolargik

Tolosaldeko Ataria 2015ko mai. 27a, 12:39

Tolosako Argia enpresa publikoak tolosarren kexa ugari jaso ditu azkenaldian etxean beste konpainia bateko komertzialen bisitak jaso izanagatik. 

Argi eta gas konpainia batzuetako komertzialak etxez etxe dabiltza azkenaldian. Helburua argia da: bezero berriak lortzea. Horraino, legala da.

Baina horietako batzuk jendea, izan Tolargiko bezeroak edo beste batekoak, engainatu nahian dabiltzala ohartarazi du Tolargik. "Komertzial hauek jendea mareatu nahian hasten dira. Kontratu merkeagoak eta deskontuak eskaintzen dizkiote jendeari, baina ondoren, fakturan mantenuko eta beste hainbat zerbitzuetako kostuak gehitzen dituzte. Azkenean, gehiago ordaintzen bukatzen da" diote Tolargiko arduradunek.

Nolabait, bezero horiek komertziala sinetsi eta kontratua sinatzen dute. Baina dagoeneko berandu izan daiteke: "Batzuk kontratua ez dute sinatu eta galdezka etorri zaizkigu, baina beste askok dagoeneko kontratua sinatu dute. Azken batean, beste konpainia batera pasatzen ari zarela sinatzen ari zara, Tolargiko arreta galtzen da, eta berriro ere atzera itzuli nahi izateak penalizazioa dakar. Beraz, gehiago ordaindu beharra".

Tolargitik azaldu dutenez, "jendeak ez daki zer sinatzen duen" eta hori dela eta, tolosarrei edozein kezkaren edo dudaren aurrean, galdetzeko eskatzen diete: "Kontsulta egiteko ez dago arazorik, beti dago aukera aldaketak egiteko, baina jakin gabe ez dezatela ezer sinatu eta kontu korronteko zenbakia eman aurrez".

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!