Aiertzak gaineratu duenez, "hemendik aurrera, udalari esker, animatzen jarraituko dugu baina goxoago eta babesean". Tolosa C.F.ko lehendakariak egungo udalari eta aurrekoari eskerrak eman dizkie kirolari eta Tolosa C.F.ri emandako laguntzarengatik, eta udal politikan aritzen direnei bide horretatik jarraitzera animatu die.
Inaugurazioan Patxi Amantegi (EAJ) eta Christian Fernandez (PSE-EE) zinegotziak izan dira. Fernandez kirol zinegotziak ireki du harmaila ofizialki, eta Amantegik Peio Aierbe (EH-Bildu) kirol zinegotzi ohia inaugurazioan izatea nabarmendu du. "Udalak kirola babestu du, eta horretarako, besteak beste, azpiegiturekin hornitzen da herria", esan du Amantegik. "Baina kirola babestea ez da hori bakarrik, baita ere kirolariekin mugitzen diren guztiei babesa ematea ere. Eta hori irudikatzeko zer hobeto harmaila baino". Bestalde, harmailetan kiroltasunez jokatzeko eskatu du.
Inaugurazio ekitaldiak aurreskuarekin jarraitu du eta horren ondoren, kadete mailako Euskal Ligako partida ikusteko aukera izan da, Tolosa C.F. eta Antiguokoren artekoa.
Komun publikoaren inaugurazioa
Gaurkoan Usabalen beste zerbitzu bat ere inauguratu da. Harmaila berrien ondoan komun publiko berri bat jarri da martxan. Pertsona guztientzako zerbitzua da, 06:00etatik 24:00etara zabalik dagoena. Kanpoaldean, gizonezkoek pixa egiteko lekua dute ere.