Marka berri bat jaio da Euskal Herrian: Basque Label harategiak. Landa, itsasertz eta elikagaien sustapenerako Hazi elkarteak eta Eusko Jaurlaritzak elkarlanean mamitu duten estrategiaren zati bat baino ez da, eta Euskal Herriko behi haragiaren ekoizpena sustatzearekin batera, haragi horren merkaturatzea bultzatu eta eraberritzea da jomuga nagusia.
Bide horretan, behinola Euskal Okela saltzen izan zen bezala, Muñagorri harategi tolosarra lehen Basque Label harategia da. Bertako haragia eta bertako produktuak eskainiko dituzte harategiok baina, horrekin batera, sektorea bera berritzeko apustua egingo dute. Muñagorriren kasuan, komertzioaren itxura eta diseinua eraberritzea izan da pauso nagusia, eta horrekin batera iritsi da, gainera, belaunaldi aldaketa ere.
Ekitaldian izan dira, Muñagorri aita-semeekin batera, Bittor Oroz Eusko Jaurlaritzako Nekazaritza, Arrantza eta Elikagaien Politikako Sailburuordea eta Andoni Luis Aduriz sukaldaria. Azken horrek, betikoa eraberritzearen garrantziaz ohartarazi du: "Gauzak ondo egin behar dira, bai, baina ondo egiten ari direnaren itxura ere izan behar dute gauzek".
Horrela, Orozek ibilbide berri baten lehen pausotzat jo du Basque Label zigiluarena: "Iraganean izan eta ikasitako guztia etorkizunean islatu nahi dugu, lehen sektoreak, merkataritzak eta, bereziki, harakinek, horren beharra dutelako". Gainera, haragiaren inguruko eragile guztiek katean lan egitearen garrantzia ere azpimarratu du, ekoizleetatik hasi, harategietaraino joan eta sukaldarien sukaldeetara iritsi bitarte.