Martxoaren 19an ttipi-ttapa hasiko da Euskal Herria. Urepeldarrak izango dira lehenak eta, egunek gauei eta gauek egunsentiei bide emanez, Bilborainoko ibilbidea osatuko du Gorritiren lekuko magikoak, euskararen, euskahaldunen eta euskaldun izan nahi dutenen aldeko aldarri kolektiboa osatuz.
Hemeretzi Korrika antolatu ditu jada, AEK-k, hemeretzigarrenez iki-iki-iki poliki edo Hemen gaude euskararen alde! oihuak kantatuko dituzte milaka herritarrek. Eta, zenbaki horri eutsiz, euskal gizarteko 19 pertsona esanguratsuren testigantzak bildu dituzte Gu euskahaldunak gara ikus entzunezkoan.
Elkarrizketez jositako lana da, eta denek beren ahalduntzeaz kontatzen dute, euskarari dagokionez. Bide beretik, gainera, ahuleziak ere hizpide dituzte, norbanako zein kolektibo moduan.
Horrela, beraz, Peru Magdalenak aurkeztuta, 38 minutuz euskararen eta euskalgintzaren iraganaz, geroaz eta berreskurapenaz dihardute, besteak bete, Kirmen Uribe idazleak, Amets Arzallus bertsolariak, Reyes Ilintxeta Euskalerria irratiko kazetariak edo Maider Unda borrokalari olinpikoak.