Iritsi da eguna. I. Ataria Pilota Txapelketaren finalak bihar jokatuko dira. Guztira sei partida. 10:00etatik aurrera, Tolosako Beotibar pilotalekuan. Apirilaren 24an jarri zen martxan txapelketa, eta finalera bitarte, 261 partida jokatu dira. Batzuk gomazko paletaz, eta gehienak esku pilotan. 319 haur eta gaztetxok hartu dute parte txapelketaren lehen edizioan. Eta denak ezin iritsi finalera. Partida bat jokatu eta kalera joatea ere ez zen dotorea. Horregatik, hasierako ligaxketan bikote edo talde bakoitzak gutxienez bi partida jokatzearen aldeko apustua egin zen. Jokotik duen txapelketak, jolasetik ere bai baitu.
Alkiza, Altzo, Amasa-Villabona, Ibarra, Bidania-Goiatz, Berastegi, Albiztur, Ikaztegieta, Amezketa, Asteasu eta Tolosa. Herri guzti horietako pilotalekuetan jokatu dira partidak. Horra beste apustua: eskualdeko txapelketa izatearen erronka.
Antolakuntza lanetan ere ateak ahalik eta gehien zabaldu nahi ziren, eta emaitza, lehen bilera hartatik honaino, bikaina izan da. Tolosaldeko pilota elkarte nahiz eskolak buru belarri aritu dira lanean, ATARIA-rekin batera, txapelketa aurrera ateraz: Asteasuko Atzapar; Bidania-Goiatzeko Aurrera Saiaz; Amasa-Villabonako Behar Zana; Alegia, Altzo eta Ikaztegietako Intxurre; Ibarrako Sendi Ekintza; Tolosako Tolosa K.E.; Adunako Txulobi; Amezketako Zazpi Iturri; Zizurkilgo Ziotza, eta Albiztur, Alkiza, Altzo, Berastegi eta Ikaztegietako pilota eskolak. Guztiei eskerrik asko!
Iritsi da eguna. Finalak prest dira. Orain arte bezala, gozatzen jarraitzea geratzen da.
'Ataria' irratian, zuzenean
Larunbatean jokatuko diren finalak eta Beotibarko giroa zuzenean jarraitzeko aukera eskainiko du ATARIA Irratiak. 10:00etatik aurrera, pilotaleku bertatik. Alde batetik, noski, partiden jarraipena egingo da. Baina bestetik, azken hiru hilabeteen errepasoa egingo da, protagonistekin, txapelketaren erronka eta izaera agerian utziz.
Entzuteko, bi aukera egongo dira: 107.6 fm sintonizatuz, edo ataria.info webgunean sartuta.
TXAPELKETAKO HAINBAT DATU
Noiz hasi zen txapelketa: Apirilaren 24an.
Partaidetza: 319 neska-mutil.
Neska partaideak: 43 palaz eta 6 eskuz.
Mutil partaideak: 270 eskuz.
Bikoteak/taldeak: 145.
Jokatutako partida kopurua: 261.
Herriak/frontoiak: 11.
Pilota elkarte/eskola antolatzaileak: 14.
PARTIDEN ORDENA. Beotibar
1. BENJAMINAK B, ESKU PILOTA Gorostiaga-Murua (Altzo)
Alustiza-Agirre (Alegia)
2. BENJAMINAK A, ESKU PILOTA Gorostidi-Gorostidi (Abaltzisketa)
Urkaregi-Belauntzaran (Larraul)
3. ALEBINAK, GOMAZKO PALETA Urkola-Herrero (Asteasu)
Otegi-Urdapilleta (Asteasu)
4. ALEBINAK, ESKU PILOTA Etxeberria-Ugartemendia
(Zizurkil-Alkiza)
Amundarain-Gabirondo (Tolosa)
5. INFANTILAK, GOMAZKO PALETA Larrarte-Aburuza (Bidania-Goiaz)
Zhang-Esnaola (Orendain)
6. INFANTILAK, ESKU PILOTA Ruiz-Olano (Amezketa-Altzo)
Estarbe-Lopetegi (Tolosa)
