Aurrera darrai Gipuzkoako Bertsolari Txapelketak. Final laurdenak bihar hasiko dira Urretxu-Zumarragan eta lehen saioan eskualdeko bi bertsolari ariko dira: Beñat Iguaran eta Jexux Mari Irazu. Seikotea osatzeko, Eli Pagola, Nerea Elustondo, Asier Azpiroz eta Agin Laburu ere ariko dira. 17:30ean hasiko da saioa Ederrena pilotalekuan. Itziar Etxezarretaren gidaritzan jardungo dira bertsolariak.
Irabazten duena zuzenean sailkatuko da azaroaren 22an Zarautzeko lehen finalaurrekorako.
Errenterian ere, saioa
Urretxu-Zumarragoarekin batera Errenterian ere final laurdetako saioa izango da asteburu honetan. Honakoan, aurrez aurre ariko diren bertsolariak Amaia Iturriotz, Ane Labaka, Beñat Gaztelumendi, Iñaki Gurrutxaga, Iñigo Mantzizidor Mantxi eta Jon Martin izango dira. Saioa igandean izango da Errenteriako Agustina Otaola raketista profesionala pilotalekuan. Eta Imanol Artola Felix amezketarra izango da saioko aurkezlea.
Sarrerak salgai
Bi saioetarako sarrerak salgai daude, final laurdenetako saio guztietarako bezala, www.bertsosarrerak.eus webgunean. Gaztetxoen sarrera 4 euroan da, Bertsozale Elkarteko bazkideena 8 euroan eta gainerakoena 11 euroan. Saioetako egunean sarrerak aretoetako leihatilan 16:00etatik aurrera jarriko dira salgai.
Asteazkenetik gainera dagoeneko salgai ere badaude Gipuzkoako Bertsolari Txapelketako finalerako sarrerak, aurretik aipatu webgunean bertan. Sarreren prezioa honakoa da: 10 euro gaztetxoentzat; 15 euro Bertsozale Elkarteko bazkideentzat eta 20 euro gainerakoentzat.