Basamortuaren erdian dauden Tindoufeko errefuxiatu kanpamentuetatik 23 ume iritsi dira Tolosaldera aurten. Horietatik hamabik Amasako apaiz etxean hartu dute ostatu, Maiatzak 20 elkartearen ekimenari esker. Beste hamaika umek, harrera familiekin pasako dute uda lauk Tolosan, binak Villabona eta Anoetan eta banak Alegia, Ibarra eta Alkizan.
Amasa-Villabonako udaletxean Oporrak bakean programan parte hartzen duten haur saharauiarrei egindako harrera ekitaldian hitz egin du Unai Iraola, Alegiako alkateak: «Badakigu haurrek hemengo baliabideen beharra dutela, baina Espainiak, Marokok eta gainerako indar inperialistek ezarritako gatazka egoera baten ondorio bat da egoera. Programa hauez gain, gatazka politikoari konponbidea eman eta autodeterminazio eskubidea bermatzea da Saharar herria laguntzeko bidea».
Udako bi hilabeteak dira gogorrenak basamortuan bizitzeko Maite Izagirre, Amasa-Villabonako alkatearen iritzian. «Itzalean tenperatura 55 gradutara igo daiteke. Beraz, klima epelago eta erosoago batean egoteko aukera eman nahi diegu haurrei». Amasa-Villabonako Udala saharar herriak bizi duen egoerarekin «erabat kontzientziaturik» dagoela esan du Izagirrek eta eskerrak eman dizkie haur hauek beraien etxe eta familietan hartzen dituzten familiei.
Tolosaldera etorri diren 23 umeetatik zazpi lehen aldiz etorri dira Euskal Herrira, gainerakoak errepikatu egin dute esperientzia. Abuztuaren 31ra arte egongo dira gure artean eta mediku azterketak pasatzeaz gain, ekimenak egingo dituzte goizero.
OSTEGUNEAN ANOETAN
Saharako bi haurrekin batera, Errusiako neska bat etorri da uda pasatzera Anoetara. Ume hauek herriko hiru familiekin pasako dute uda. Anoetako Udalak harrera «xumea» egingo die ostegunean, udaletxeko areto nagusian, 18:00etan hasita.
Ana Trapero 'Oporrak bakean' ekimeneko arduradunari egindako elkarrizketa entzungai: