Ibarrako Kilometroak festan, sormen gune bilakatu dira Emeterio Arrese plaza, Azkue auzoa eta herriko beste hainbat txoko. Kilometroak festaren eredu berrian, lehen aldiz antolatu dituzte hitzaldiak. Batzuk Uzturpe Ikastolan izan dira, beste batzuk, berriz, herriko plazatik gertu, kultur etxean eta Txontxo lokalean. Hala ere, ez dute esperotako erantzuna izan.
Bestetik, Azkue auzoan, artisauen azoka izan da. Dozena bat postu baino gehiago jarri dituzte, eta bertaratu direnek era guztietako produktuak erosteko aukera izan dute. Gune berean, Irribartea eskultura erakusketa jarri dute ikusgai, eta haur nahiz gaztetxoek eskultura propioak egin ahal izan dituzte. Asko animatu dira lan horiek egitera. Azkuen bertan, Harituz Bertsozale taldeak antolatuta, bertso tailerra egiteko asmoa zuten, baina ez du erantzunik izan, eta azkenean, Ane Beloki eta Maialen Akizu bertsolariek, bertso saio bat inprobisatu behar izan dute.
