Aldaba, sanmigeletarako prest

Hiru egunetako jaiak antolatu dituzte Tolosako Aldaba auzoan. San Migel egunaren inguruan egiten dituzte festak, eta bihar arratsaldean hasiko da beraz egitaraua txupinazoarekin. Meza izango da ondoren eta jarraian herri afaria egingo dute. Joxe Ramon Emanalde festa batzordeko kideak azaldu duenez, «90 bat lagun bizi gara auzoan, baina festetan etortzen dira ere orain bertan bizi ez direnak, eta festetan denak elkartzen gara, jende talde polita biltzen gara».

Frontoia izaten da festagune nagusia, eta bertan egin ohi dituzte afari eta bazkariak. Orain urte pare bat frontoiaren bueltan toldoa jarri zuten eta ixteko aukera badute. «Horrek pixka bat salbatzen digu eguraldi txarra izanda ere, babes ona izatea», esan du Emanaldek.

Txirrindulari igoerarekin jarraituko dute larunbatean festa ekitaldiek. Klasiko bihurtu den kirol proba da. «Urte batean bertan behera utzi genuen, AHTaren obrak zirela-eta errepidea egoera txarrean zegoelako, eta jendea pixka bat haserretu zen», ekarri du gogora Emanaldek. Zahagiardoa egingo dute afaltzeko, norberak bere janaria eramanez eta festa batzordeak jarriko du edaria. Iaz 140 pertsona inguru elkartu ziren, eta espero dute aurten ere errepikatzea. Gauean trikitilariak ariko dira.

Igandean bukatuko dira festak eta egun osoko egitaraua izango dute. Goizean, meza, Sutarrikoen emanaldia eta toka txapelketa izango dute. Bazkaria catering bidez egiten dute, horrela antolatzaileek atseden pixka bat ere hartzeko. Herri kirolak izango dira arratsaldean, eta egun guztian zehar trikitilariek girotuko dituzte festak.