Gora-beheratsua izan zen larunbateko saioa Hendaiako Beltzenia frontoian. Behetik gorakoa egin zuen Amaia Agirre billabonatarrak eta barrenak hustu zituen kartzelakoan. Beretik jardun zuen ariketa horretan eta publikoaren esker ona jaso zuen. Horixe zuen helburu Amaiak hasiera hasieratik, "publikoarekin bat egitea". Emaitzarekin gustura azaldu zen saioa bukatu eta berehala.
Jexux Mari Irazu larrauldarra indartsu dator aurtengo Txapelketa Nagusira. Eroso jardun zen igandean Altsasun ospatutako kanporaketan. Kartzelako ariketan sinisgarri aritu zen eta bertsorik borobilenak bertan eman zituen eskualdeko bertsolariak. 666,5 eskuratu ditu Jexux Mari Irazuk eta hortaz, aukera handiak ditu hurrengo fasean kantatzeko. Finala du jo puntuan larrauldarrak.
Legazpin jokatuko da bosgarren kanporaketa. Saioa hurrengo larunbatean, hilaren 19an, izango da, 17:30ean, Urbeltz pilotalekuan. Sei bertsolari arituko dira: Ainhoa Agirreazaldegi, Beñat Lizaso, Igor Elortza, Inigo Mantzizidor Mantxi, Jokin Uranga eta Oihana Bartra.
Asteazkenean, Ataria Irratian, 16:30etik aurrera emango dugu Txapelketa Nagusiaren berri. Bertsoaldi aipagarrienak entzun eta txapelketaren martxari begiratuko diogu.