Tolosako Biodibertsitate Guneak irteera eta mintegi bat antolatu ditu abenduko jarduera eskaintzaren barruan. Irteera abenduaren 3an, igandean, egingo dute Leaburu-Belauntza inguruan, landa atlantikoko ekosistema arautzen duten gakoak behatzeko eta ulertzeko. Irteera 09:00etan abiatuko da Dama Berdetik.
Hilaren 13an, berriz, Tolosaldean harrapatutako fauna basatiaren azterketaren 2023ko emaitzak aurkeztuko dituzte. Biodibertsitate Guneak 2023an Tolosaldean harrapatutako fauna basatiaren jarraipen eta monitorizazioa egin du, bide-sareek inguruko fauna ornodunean duten eragina ezagutzeko. Herritarren parte hartzeari esker gauzatu ahal izan da ikerketa hori, borondatez, eskualdeko bideetan harrapatutako fauna basatiaren inguruko informazioa jasotzen lagundu baitute. Abenduaren 13ko saioan, azken hilabeteetan jasotako informazioaren ondorio eta emaitzak aurkeztuko dituzte hain zuzen, 18:00etan Antxon Bandres txokoan.